習慣

原來，影 Mini Cooper 都係習慣.....

祝大家新年進步！

江山易改

有一個好出名嘅心理學實驗叫「棉花糖實驗」（Stanford Marshmallow Experiment＊）

實驗過程係放一粒棉花糖响受測試嘅對象（3至5歲小朋友）面前，如果小朋友响實驗者離開嘅十五分鐘（或更長時間）偷食，會有多一粒。實驗者跟進呢班小朋友，發現「延遲滿足」嘅小朋友自制力強，大個後嘅考試成績、教育程度、健康等多方面都比較好（但不代表個人成就較好）。

我相信自己都係唔會偷食嘅一類人，由細細個就有呢種性格，真係想改都改唔到。現實中見到其他人「即時滿足」，自己就戇居居咁等，實驗者係唔係真係會返嚟，唔知係唔係真係會多一粒糖，其實有時都幾矛盾，好唔好「袋住先」。

題外話，曾經分別同不只一個好友提起，我要做一個浪子！！！（可見我受幾大打擊....)

但大家都不約而同咁回覆我，「你慳啲喇！」，真係 hurt..... 嗚.....

＊按：同Stanford psychology experiment 一樣咁出名。咦，又係Stanford 嘅？

情人節快樂

好友驚訝本人竟然係「癡漢」（據我理解，應該係「癡情漢子」咁解），有點受寵若驚，只可以講一句「情痴總有缺撼，情深總要別離。天意愛弄人，誰人可退避」。

為念友人，先來一個自閉老麥早餐

再來一個男人的浪漫

最後，由於劉森記太多人，退而求其次食個油渣麪作結，亦無打算去睇《格雷》，望友人收貨。

總結——浪漫？乜嚟㗎？食得㗎？

（其實毒L一個更開心⋯⋯ 嗚⋯⋯）

爭議性話題

最近腦海中有些具爭議性的話題，例如——

對動物人道毁滅
對婚姻制度的質疑

奈何只有鬆散的論點，又無咁好文筆手寫我心，都係擱在一旁吧....

習慣

有一個講法，如果同一個行為（不論是好是壞）連續每日去做，廿一日後就會養成習慣。

幾年來為你養成不少習慣

每次行過書店或精品店，都會留意有無 Tigger 跳跳虎，見到就會即刻影低send 俾你。

改不了。

標題黨

何謂「標題黨」？根據《香港網絡大典——標題黨》條目

標題黨是指在網絡中故意或刻意使用較為誇張、聳動或斷章取義的文章標題，以吸引網友點擊觀看，特別是實際上標題與內容完全無關或聯繫不大者，或標題文字需用較冷門的方法理解。

在網絡中，一些網友在發帖時為了能在海量的資訊中較快的吸引網友的注意，使用一些較為有新意，同時也比較誇張的文章標題，但其文章的實際內容與文章標題關係不大，甚至是毫無關聯，只是字面意思所產生的誤差所致。

—— http://evchk.wikia.com/wiki/標題黨

人靠衣装、佛靠金装。書，都不過係一件商品。除非係經典作品，又或者有口碑、有話題性（當然口碑、Bestseller 等有不少水份，或由鱔稿吹捧），如果唔係標題或封面設計特別，幾難從書海中突為而出。人生時間少，但爛書多（是主觀的爛，正如我不太懂欣賞紅酒一樣，不代表內容差），要揀到好書都不容易。

再三強調，大多數購物行為係衝動。我不時被一些 Bestseller 或標題、封面特別的書吸引，但買回來讀一兩頁（或幾十頁）後發覺內容乏善可陳，已經大概估到後面的內容（更甚者，由標題已經知到內容）

也許你手執一本，坐於 Starbucks 打開某一頁，可以吸引眼球；又或者把書放在咖啡杯旁合照，可以在 Facebook 或 Instagram 呃幾十個Like 就值回票價。可惜其書內容真係不懂欣賞，唯有當作書架裝飾。（重申，只係我唔識欣賞，唔代表本書唔好）

Blink by Malcolm Gladwell

好鍾意呢本書個 Design，但對唔住我只係讀到20頁.....

按：常與友人戲謔，出一本《如何賺香港人的錢》，應該可以成功賺到香港人的錢。有興趣的朋友歡迎與本人接洽。

執書者言 之二

小說，從來不會出現在我的書單上。

讀小說，一班虛構人物在內互動，總覺得讀完後無太大得着。

長篇小說，人物眾多，許多時候都搞不清、記不起那個角色，之前有出現過嗎？不要說翻譯小說，更不要說俄文翻譯小說，讀那一本《伊凡・伊里奇之死》，要欣賞文中帶出對死亡的看法、生命的意義，恐怕要先搞清楚伊凡．伊里奇、普拉斯柯維亞．費多洛芙娜、彼得．伊凡諾維奇、費多爾．瓦西里耶維奇等人的關係⋯⋯ 我相信自己不只是臉盲症，連虛構人物、場境都不能在腦中還原，是決乏想像力吧。

題外話，我一直相信自己無能力可做到疑犯拼圖
連自己最親、成日見嘅人，呃⋯⋯即係自己，都應該拼唔出

小說，從來不會出現在我的書單上。

但，人生好似缺少了甚麼，好似少了休閒，好以一切都要有原因、有得着，好似太沉重。所以執起一本 The Catcher in the Rye，有趣，有點 carefree 嘅感覺（唔知點用中文形容，「無痛」？）

讀完，會再選另一本。The Great Gatsby 或 The Grapes of Wrath 好嗎？

按：其實我唔係完全不讀小說，至少金庸、衛斯理讀過不少，還有一些翻譯小說，只是人物、故事「過目即忘」⋯⋯ 

仙草奶凍，微糖、少冰

你說我的仙草奶凍古怪，微糖味道太淡。
我話你的珍珠奶茶太甜，熱飲同樣不配。

最後，我會要一杯熱珍珠奶茶少甜。
心思，原來小得微不足道。

執書者言 之一

從小學開始，最不喜歡做三樣功課（雖然其他都唔鍾意），分別係書法、美術及讀書報告／剪報。

頭兩者可見我欠缺藝術天份，不贅；後者則見我不善表達情感。小時候最愛科普及心理學讀物，對囈囈喃喃的小說、文學不感興趣。作者已死，但老師評閱讀書報告／剪報時，心中有既定立場，又有標準答案，哪為何要學生寫感想呢？

人漸成長，不再是無憂無慮的小伙子。面對家庭、工作、愛情等人生洗煉，有感迷失，唯有從書中找尋方向，祈借此平台，一抒己見，結交同好。「甲之熊掌，乙之砒霜」，是故網中文章只是個人感覺，絕不客觀（更不是書評），請看倌見諒。

粵語中「執書」者「執輸（吃虧）」也，更有謂「執輸行頭慘過敗家」。一介書生，老實人一個（粗俗講句就叫「擔屎唔偷食」）。唯以《勸學詩》勉之 —— 

富家不用買良田，書中自有千鍾粟。

安居不用架高堂，書中自有黃金屋。

娶妻莫愁無良媒，書中有女顏如玉。

出門莫愁無人隨，書中車馬多如簇。

男兒欲遂平生志，五更勤向窗前讀。